” 2012 წლის 4 ივლისს ომბუდსმენის რწმუნებული შეხვდა და გაესაუბრა ზუგდიდის მრავალპროფილიან კლინიკურ საავადმყოფო „რესპუბლიკაში“ განთავსებულ მოქალაქე გიორგი ქავთარაძეს.

ქავთარაძის განმარტებით, 2012 წლის 3 ივლისს, მეგობრებთან ერთად იმყოფებოდა სოფელ ანაკლიაში, საზაფხულო ბანაკის მიმდებარე ტერიტორიაზე, სადაც გადაწყვეტილი ჰქონდათ ღამის ადგილზე გათენება.

ქავთარაძის გადმოცემით, ღამის საათებში მათთან მივიდა პოლიციის ავტომობილი, საიდანაც გადმოვიდა სამი პიროვნება. ერთ–ერთმა პოლიციელმა მას მოსთხოვა ავტომობილის საბუთები და მართვის მოწმობა. საბუთების წარდგენის შემდეგ ქავთარაძეს მოსთხოვეს ალკოჰოლის ტესტის გავლა, რის შემდეგაც იგი მეგობრებთან ერთად ჩასვეს პოლიციის ავტომანქანაში და გადაიყვანეს ანაკლიის პოლიციაში.

ქავთარაძის განცხადებით, ის და მისი თანმხლები პირები მოათავსეს ერთ ოთახში. ქავთარაძემ პოლიციელს სთხოვა, არ დაეკისრებინა მისთვის ადმინისტრაციული ჯარიმა, ვინაიდან მას ადრე უკვე ჰქონდა დაკისრებული ადმინისტრაციული სახდელი. აღნიშნულის გამო პოლიციის თანამშრომელმა მას მიაყენა სიტყვიერი და ფიზიკური შეურაცხყოფა, კერძოდ, ხელი გაარტყა მარცხენა წარბის არეში, რის შემდეგაც ქავთარაძემ იგრძნო თავბრუსხვევა. ქავთარაძის თქმით, პოლიციის თანამშრომლებმა მის მეგობრებსაც მიაყენეს სიტყვერი და ფიზიკური შეურაცხყოფა”– აღნიშნულია განცხადებაში

ომბუდსმენის განმარტებით, მომხდარი ფაქტის შემდეგ მას უჭირს მეტყველება.

სამედიცინო ბარათში გაკეთებული ჩანაწერების მიხედვით, ქავთარაძეს სამედიცინო ნაწილში შესვლისას აღენიშნებოდა ნევროზული მდგომარეობა, ნაკაწრი ჭრილობები თავისა და გულმკერდის არეში. მას თავის ტვინის შერყევის დიაგნოზი დაუდგინეს.

კომენტარები